Árlegur fugladagur Náttúrustofu Austurlands og Ferðafélags Fjarðamanna var haldinn laugardaginn 3.maí 2025. Eins og vanalega var boðið upp á fuglaskoðun á tveimur stöðum, annars vegar við ós Norðfjarðarár kl 11:30 og við Andapollinn á Reyðarfirði kl 12:30.
Gott veður var á Norðfirði, sól og rúmlega 3°C en heldur mikil og köld hafgola. Á Reyðarfirði var blíðskapar veður, heiðskýrt og hiti um 6°C. Það var því svolítið svalt þó það væri bjartur og fallegur dagur á báðum stöðum.
Fjórir mættu við Andapollinn á Reyðarfirði en tólf á Norðfirði auk starfsfólks Náttúrustofunnar. Fjöldi tegunda sem sást að þessu sinni voru alls 26 á Reyðarfirði en 21 á Norðfirði. Eru það aðeins færri tegundir en oft áður á báðum stöðum.
Á Reyðarfirði sáust:bjargdúfa, skúfönd, grágæs, skógarþröstur, hettumáfur, hrossagaukur, heiðlóa, auðnutittlingur, maríuerla, stelkur, tjaldur, sandlóa, kría, sendlingur, hrafn, lóuþræll, tildra, hávella, æður, teista, stokkönd, fýll, heiðagæs, þúfutittlingur, silfurmáfur og rita
Á Norðfirði sáust: Álft, grágæs, rauðhöfði, æður, hávella, straumönd, toppönd, tjaldur, sandlóa, sendlingur, lóuþræll, tildra, stelkur, jaðrakan,hettumáfur, silfurmáfur, kría, þúfutittlingur, fýll, dúfa og stokkendur.
Kolbrún Sverrisdóttir fuglafræðingur hefur starfað hjá Náttúrustofunni sem sumarstarfsmaður og í afleysingum frá árinu 2023 samhliða meistaranámi sínu í líffræði við Háskólann í Lundi í Svíþjóð þaðan sem hún útskrifaðist í október sl. Lokaverkefni hennar snéri að varpárangri skúms á Úthéraði. Kolbrún kom aftur til starfa eftir fæðingarorlof í febrúar sl. Hún hefur umsjón með ýmsum verkefnum sem tengjast fuglarannsóknum hvers konar og er með aðsetur á Egilsstöðum. Við bjóðum hana sannarlega velkomna í hópinn okkar.